WordPress.org sayti ma’muriyati WP Engine hosting provayderiga o’z manbalariga kirishni taqiqlab qo’yishi bilan vaziyat yanada keskinlashdi. Bunday qaror WordPressning asoschisi va Automattic rahbari Matt Mullenweg bilan WP Engine o’rtasidagi kelishmovchiliklar tufayli qabul qilindi.

Mullenwegning aytishicha, WP Engine yuridik masalalar hal bo’lguniga qadar platforma manbalariga, jumladan, mavzu va plaginlarga kirish imkoniyatiga ega bo’lmaydi. Uning ta’kidlashicha, WP Engine WordPress foydalanuvchilari tajribasini o’z nazoratiga olishga intilib, avtorizatsiya tizimlari, server yangilanishlari, plaginlar, mavzu va boshqa manbalar kataloglari bilan boshqarishga harakat qilmoqda.

Mullenwegning ta’kidlashicha, WP Engine o’z mijozlariga GPL litsenziyasi bo’yicha o’zgartirilgan WordPress kodini taklif qilishi va o’z xizmatlarini ko’rsatishi mumkin. Biroq, WP Engine serverlari endi WordPress manbalariga bepul ulana olmaydi. Ushbu taqiq tufayli WP Engine foydalanuvchilari WordPress.org orqali plaginlarni o’rnatish va mavzulardan yangilash imkoniyatidan mahrum bo’ladilar.

Ko’plab ishlab chiquvchilar va WordPress tarafdorlari bunday cheklovlar WP Engine foydalanuvchilarining xavfsizlik yangilanishlarini olish imkoniyatiga to’sqinlik qilishi mumkinligi va bu ularning veb-saytlarini zaiflashtirishi mumkinligi haqida xavotir bildirmoqdalar. O’z navbatida, WP Engine ushbu muammoni hal qilish ustida ishlamoqda va taqiq saytlarning ishlashi, ishonchliligi yoki xavfsizligiga ta’sir qilmasligini, shuningdek, kod yoki kontentga o’zgartirish kiritish imkoniyatini ham cheklamasligini ta’kidlamoqda.

Shuni ta’kidlash kerakki, WordPress Internetdagi barcha veb-saytlarning qariyb 40 foizini Automattic va WP Engine kabi turli xil hosting provayderlari orqali qo’llab-quvvatlaydi. Foydalanuvchilar ochiq manbali loyihani olib, veb-saytlarni mustaqil ravishda ishga tushirishlari mumkin, ammo ko’pchilik tayyor echimlardan foydalanishni afzal ko’radi.

WP Engine va Automattic o’rtasidagi qarama-qarshilik o’tgan hafta Mullenwegning WP Engine kompaniyasini “WordPress saratoni” deb ataganidan keyin boshlandi. Mullenwegning aytishicha, kompaniya WordPress jamoasini rivojlantirishga etarli hissa qo’shmasa-da, Automattic va WP Engine har yili yarim milliard dollarga yaqin daromad oladi.

Ayblovlarga javoban WP Engine Mullenweg va Automatticga shunga o’xshash bayonotlarni tarqatishni to’xtatish talabi bilan xat yozdi. Xatda Automatticning WP Engine kompaniyasidan daromadning bir qismini to’lashni talab qilib, “vayronakor taktikalar” qo’llash bilan tahdid qilgani aytilgan. Buning javobida Automattic ham WP Engine kompaniyasiga WordPress va WooCommerce savdo belgilarini buzganlikda ayblab, to’xtatish va voz kechish to’g’risida xat yubordi.

WordPress Foundation esa TechCrunch nashriga bergan intervyusida WP Engine kompaniyasining savdo belgilaridan foydalanish siyosatini buzganligini ma’lum qildi. Fondning ta’kidlashicha, “Hech kim WordPress savdo belgilarini mahsulot, loyiha, xizmat, domen nomi yoki kompaniya nomining bir qismi sifatida ishlatish huquqiga ega emas. WP Engine ushbu siyosatni bir necha bor buzgan va Automatticning xati bu kabi buzilishlarga misol bo’ladi”, deyiladi fondning bayonotida.

WP Engine WordPress.org saytida blokirovka qilingandan so’ng, Mullenweg o’z blogida asosiy nizoning savdo belgilariga tegishli ekanligini ta’kidladi. Uning so’zlariga ko’ra, Automattic uzoq vaqt davomida WP Engine bilan litsenziya shartnomasini tuzishga harakat qilib kelgan va kompaniyadan litsenziya to’lovi yoki ochiq manbali loyihani rivojlantirishga hissa qo’shishni taklif qilgan. Biroq Mullenweg qanday hissa qo’shish kerakligi haqida batafsil ma’lumot bermadi.