Casio kompaniyasi o’zining tarmog’iga avtorizatsiyadan o’tmagan kirish bo’lgani haqida xabar berdi. Bu hodisa 5 oktyabr kuni sodir bo’lib, kompaniya ishlarida jiddiy uzilishlarga olib keldi.

O’tkazilgan ichki tekshiruvlar natijasida ushbu hodisa tizimda nosozlikka olib kelgani va bir qator xizmatlarning ishlashini buzgani aniqlandi.

Hozirda kompaniya tashqi mutaxassislar bilan hamkorlikda bu hodisaning miqyosini va oqibatlarini aniqlash bo’yicha keng ko’lamli tekshiruv olib bormoqda. Ayniqsa, shaxsiy ma’lumotlarning o’g’irlanishi xavfi katta e’tibor bilan o’rganilmoqda.

Casio vakili quyidagicha ta’kidladi: “Biz hozirda ushbu hodisaning tafsilotlarini faol o’rganib chiqmoqdamiz, bizning asosiy vazifamiz ma’lumotlar tarqab ketishining miqyosini aniqlash va potentsial xavflarni minimallashtirishdir.”

Ushbu voqea yuz berganidan so’ng, Casio darhol tegishli organlarga xabar berdi va qo’shimcha xavfsizlik choralarini ko’rdi. Xususan, tashqi tarmoqqa ulanishlar cheklandi va monitoring tizimlari shubhali harakatlarni o’z vaqtida aniqlash uchun kuchaytirildi.

Kompaniya o’zining mijozlari va hamkorlariga tarmoq infratuzilmasini himoya qilish va bunday holatlarning takrorlanishining oldini olish uchun barcha kerakli choralar ko’rilayotganini ta’kidladi. “Biz vaziyatga tezkorlik bilan javob berdik va mutaxassislar bilan hamkorlikda xavfsizlik tizimimizni takomillashtirish bo’yicha ishlarni amalga oshirmoqdamiz”, – deyilgan kompaniyaning rasmiy bayonotida.

Bundan tashqari, Casio yuzaga kelgan noqulayliklar uchun omma oldida uzr so’radi. Kompaniya muammoni imkon qadar tezroq hal qilish va himoyani mustahkamlashga sodiq ekanligini ta’kidladi. Mijozlarga esa ehtiyot bo’lish va kompaniyaning mahsulotlari bilan bog’liq har qanday shubhali harakatlar haqida xabar berishga chaqirdi.